Aksionet e lidhura me kriptovalutat shënuan rënie të ndjeshme sot, të nxitura nga tërheqja e investitorëve nga aksionet teknologjike dhe segmentet më të rrezikshme të tregut.
Ndërmjet këmbimoreve të kriptovalutave, Coinbase dhe eToro ranë me më shumë se 5 për qind, ndërsa Robinhood dhe Bullish shënuan rënie mbi 6 për qind. Kompania e shërbimeve financiare në fushën e kriptovalutave, Galaxy Digital, pësoi një rënie deri në 11 për qind, shkruan CNBC.
Në të njëjtën kohë, çmimi i Bitcoin ra me gati 3 për qind, duke u ulur në pak mbi 113 mijë dollarë. Sipas të dhënave të Coin Metrics, ether ra mbi 4 për qind dhe po tregtohej në nivelin e 4100 dollarëve. Kjo rënie erdhi pasi Bitcoin arriti javën e kaluar një rekord të ri prej gati 125 mijë dollarësh.
Duket se sot investitorët janë tërhequr në masë nga aksionet teknologjike – një sektor që javën e kaluar ishte në rritje për shkak të spekulimeve mbi ulje të mëtejshme të normave të interesit.
Indeksi teknologjik Nasdaq Composite ra me më shumë se 1 për qind, i shtyrë poshtë nga rënia e vlerës së Nvidia dhe gjigantëve të tjerë teknologjikë. Tregu i kriptovalutave shpesh ndjek lëvizjet e aksioneve teknologjike për shkak të bazës së ngjashme të investitorëve që fokusohen në rritje, natyrës spekulative dhe prirjes për rritje në mjedise me norma të ulëta interesi.
Këtë javë, investitorët po ndjekin me vëmendje simpoziumin vjetor ekonomik të Rezervës Federale në Jackson Hole, në kërkim të sinjaleve mbi veprimet e ardhshme të bankës qendrore.
Nëse kryetari i FED-it, Jerome Powell, sinjalizon mundësinë e një politike monetare më të butë, tregu i kriptovalutave mund të rikuperohet.
“Sapo Powell flet në Jackson Hole, zakonisht shohim marrje fitimesh përpara deklaratave të tij”, tha Satraj Bambra, drejtor ekzekutiv i shkëmbimores hibride Rails.
“Sa herë që ka pasiguri në komunikimin e FED-it, në përgjithësi mund të prisni marrje fitimesh, pasi tregtarët ulin rrezikun në pozicionet e tyre”, shtoi ai.
Pavarësisht rënies aktuale, aksionet e kriptovalutave kanë shënuar rritje të fortë gjatë muajve të fundit, të nxitura nga përfshirja e Coinbase në indeksin S&P 500, oferta publike fillestare e suksesshme e Circle, si dhe korniza ligjore për “stablecoin”.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
