Ekspertët kinezë të dronëve kanë fluturuar për në Rusi për të kryer punë zhvillimi teknik mbi dronë ushtarakë në një prodhues shtetëror armësh që është nën sanksione perëndimore, sipas dy zyrtarëve evropianë të sigurisë dhe dokumenteve.
Siç raporton Reuters, ekspertët kinezë kanë vizituar prodhuesin e armëve IEMZ Kupol në më shumë se gjashtë raste që nga tremujori i dytë i vitit të kaluar. Gjatë kësaj kohe, Kupol gjithashtu ka marrë dërgesa me dronë sulmi dhe mbikëqyrjeje të prodhuar në Kinë përmes një ndërmjetësi rus, sipas dokumenteve dhe dy zyrtarëve, përcjell Insajderi.
Në shtator të vitit të kaluar, Reuters dokumentoi se Kupol kishte zhvilluar një dron të ri, Garpiya-3, në Kinë me ndihmën e specialistëve vendas.
Zyrtarët, të cilët kërkuan që as ata dhe as organizata e tyre të mos identifikoheshin për shkak të ndjeshmërisë së informacionit, thanë se bashkëpunimi reflektonte një marrëdhënie të thelluar midis Kupol dhe kompanive kineze në zhvillimin e dronëve – të cilët kanë rezultuar të jenë tejet të rëndësishëm për luftën e Rusisë në Ukrainë.
Ministria e jashtme e Kinës tha se nuk ishte në dijeni të bashkëpunimit.
“Kina gjithmonë ka mbajtur një qëndrim objektiv dhe të drejtë mbi çështjen e krizës së Ukrainës, duke mos i ofruar kurrë armë vdekjeprurëse asnjë pale në konflikt dhe duke kontrolluar në mënyrë strikte artikujt me përdorim të dyfishtë, përfshirë eksportet e dronëve”, tha ministria në një deklaratë.
Kremlini, ministria ruse e mbrojtjes dhe IEMZ Kupol nuk iu përgjigjën kërkesave për koment.
Dokumentet, që përfshijnë faturat e biznesit dhe deklarimet bankare, treguan se Kupol mori më shumë se një duzinë dronësh sulmi me një drejtim vitin e kaluar të prodhuar nga Sichuan AEE, prodhues kinez i dronëve. /Insajderi.org/
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
