Klubi gjerman i basketbollit, BBC Bayreuth, ka siguruar shërbimet e Besnik Bekteshit.

BBC Bayreuth ka njoftuar se gjermano-kosovari e filloi karrierën e tij të basketbollit në VfL Kirchheim unter Teck dhe më vonë u transferua në Akademinë e Basketbollit (BBA) të klubit të Bundesligës, Ludwigsburg. Kjo u pasua me paraqitje në liga të ndryshme gjermane si dhe në gara ndërkombëtare. 31-vjeçari ka lindur në Ferizaj (Kosovë) dhe së fundmi ka luajtur për klubin kosovar Golden Eagle Ylli.

Kryetrajneri i BBC Bayreuth, Mladen Drijençiq, kroat nga Bosnja e Hercegovina, u shpreh i lumtur që arritën të siguronin shërbimet e Besnikut.

“Vështirësitë për të gjetur një lojtar me pasaportë gjermane dhe për të gjetur një lojtar të pozitës së tij që mund të na ndihmojë, ishin jashtëzakonisht të larta. Prandaj jam shumë i lumtur që arritëm të nënshkruajmë me Besnikun. Ai është një lojtar me përvojë, ish-lojtar i ndeshjeve ndërkombëtare i të rinjve dhe ka përvojë ndërkombëtare. Ai e njeh ProA dhe mund të luajë në dy pozita”, deklaroi Dijençiqi.

Ndërkaq, Besnik Bekteshi tha se është tejet i motivuar të japë gjithçka për skuadrën.

“Jam shumë i lumtur që kam mundësinë të luaj për një klub kaq të njohur si Bayreuth dhe jam super i motivuar të jap gjithçka për klubin dhe ekipin”, deklaroi ai.

Mediat raportojnë se 31-vjeçari do të sjellë përvojën e 48 ndeshjeve për gjigantët Ludwigsburg (2010-2013) dhe Rasta Vechta (2016/17) për klubin që aktualisht zë vendin e nëntë në tabelë në ligën ProA, që është kategoria e dytë më e lartë e Bundesligës së Basketbollit gjerman, raporton Klankosova.tv.

Së fundmi, kosovaro-gjermani, i lindur në Ferizaj, ishte nën kontratë me Golden Eagle Ylli, i renditur në vendin e katërt në Prince Caffe Superligë, i cili sezonin e kaluar u përball me Niners Chemnitz dhe Brose Bamberg në Kupën e Evropës.

Bekteshi, si lojtar gjerman i të rinjve, ndër të tjera është shpërblyer në Kampionatin Botëror U17 në Hamburg. Përveç kësaj, ai u nderua si Sportisti i Vitit i Ludwigsburgut më 2010. Megjithatë, në nivel të lartë, ai ka pësuar vazhdimisht pengesa për shkak të lëndimeve, duke përfshirë një këputje të ligamentit në mars 2013, gjë që i kushtoi të gjithë sezonin 2013/14.

Ai u rikthye në sezonin 2014–15 në ProA për ish-klubin e divizionit të parë Giesen 46ers, ku u nderua si i Riu i Muajit për paraqitjet e tij në tetor 2014. Besnik Bekteshi udhëhoqi ekipin në pikët e shënuara, asistimet dhe fitoret e topit dhe në fund u votua I riu i vitit nga ProA.

Besnik Bekteshi, i cili së fundmi ka luajtur për Tigers Tubingen nga sezoni 2018/19 deri në 2020/21 dhe më pas për VfL Kirchheim Knights nga sezoni 2021/22 deri në 2022/23 në Gjermani, ka luajtur mesatarisht 18 minuta për lojë në sezonin e tij të fundit, duke shënuar 4.8 pikë. Kjo u pasua me kalimin te Golden Eagle Ylli.

Bekteshi do të mbërrijë sot në Bayreuth për një ekzaminim mjekësor. Është ende e diskutueshme nëse ai do të mund të luajë në ndeshjen e radhës ndaj Giessen si mysafir. /Klankosova.tv