Aleanca e Gruas e AAK-së, është shprehur e brengosur për pozitën e gruas në shoqërinë kosovare për të cilën thonë se është e pakënaqshme.

Kështu u tha në një tubim me gratë e AAK-së, ku në këtë parti aderuan rreth 30 gra, kryesisht nga Podujeva dhe Istogu.

”Përfshirja e pamjaftueshme e saj në vendimmarrje, kuotat e ulëta të përfaqësimit, numri jo i mjaftueshëm i grave të punësuara si dhe trajtimi i gruas në përgjithësi, shoqërinë kosovare po shndërrojnë në një shoqëtri maskiliste”, shkruan AAK në Facebook.

Me këtë rast kryetari i AAK-së, Ramush Haradinaj, ka thënë se gruaja duhet ta marrë pozitën që i takon dhe se duhet të marrë pjesë në vendimmarrje, e në përcaktimin e politikave në vend.

“Gruaja sot është gjysma e shoqërisë, dhe ajo duhet ta marrë pozitën që i takon. Është e drejtë e saj, që ajo të jetë edhe në vendimmarrje, edhe në përcaktimin e politikave në vend, edhe në drejtimin e shoqërisë”, tha  Haradinaj./Insajderi.com