Mali i Zi, pas ndryshimit të qeverisë për herë të parë në 30 vjet, ka mbetur në rrugën e tij evropiane dhe është i përkushtuar ndaj NATO-s, thotë Dritan Abazoviq.

Duke iu drejtuar Komisionit për Punët e Jashtme të Parlamentit Evropian, zëvendëskryeministri i Malit të Zi theksoi se asgjë apokaliptike nuk ndodhi pas ndryshimit të qeverisë.

“Qeveria e re malazeze, 100 përqind – unë mund të garantoj – nuk është pro-ruse”, tha ai.

“Qëllimi ynë është të bëhemi anëtari tjetër i BE-së, gjë që do të jetë e vështirë të arrihet, sepse, ashtu si në vendet e tjera në rajon dhe vendet post-komuniste, nuk është aq e lehtë të zbatohen shpejt reformat”, tha Abazoviq.

Ai theksoi se sigurisht beson se cilësia e reformave është më e rëndësishme sesa koha e nevojshme për zbatimin e tyre. “Agjenda jonë është e qartë – ne besojmë se Mali i Zi është një vend i Evropës Perëndimore, i cili është i përkushtuar ndaj vlerave Euro-Atlantike”, nënvizoi ai.

Duke folur për ligjet e prokurorit, ai shpjegoi se asnjë rezultat nuk mund të arrihet me njerëzit që tani drejtojnë zyrën e prokurorit në Mal të Zi.

Abazoviq theksoi se Qeveria dëshiron ta ndjekë agjendën e BE-së dhe se nuk dëshiron të bëjë asgjë që është kundër vullnetit ose standardeve të BE-së, por që duhet gjetur një zgjidhje e përbashkët. /Insajderi.org