Rritja e çmimeve në Kosovë po vazhdon të mbetet diskutim e brengë e vazhdueshme e qytetarëve.

I pari i Lidhjes Demokratike të Kosovës, Lumir Abdixhiku , përmes një postimi në facebook ka publikuar listen e inflacionit të çmimeve për disa shtete, ndër to e përfshirë edhe Kosova.

Abdixhiku thotë se kryeministri Albin Kurti nuk e njeh realitetin dhe rritjen e çmimeve e vështirësive që kanë familjet kosovare, shkruan Insajderi.

Krahasuar me vendet e tjera, Kosova duket se del e treta për nga rritja e inflacionit, ku para vetes ka vetëm Rusinë e Ukrainën, shtete këto që janë në luftë tash e sa muaj.

“Kosova është në krizë shumë më të thellë se çdo shtet evropian – e ne nuk kemi Qeveri që u del në krah qytetarëve të saj”, ka shkruar Abdixhiku në facebook.

Ai shtoi se propozimet e zgjidhjet e këtij problemi Kurti i ka që nga marsi i këtij viti, por përsëri qeveria nuk po u del në krah qytetaëve.

“As atëherë kur inflacioni arrinë frikshëm në 14.1% e as atëherë kur propozimet e zgjidhjet i ka që nga marsi i këtij viti në tavolinë”, ka shkruar kryetari i LDK-së

Postimi i plotë:

Sepse në Evropë ‘nuk ka’ shpresë!

Popullisti Albin Kurti nuk e njeh më realitetin. I dehur nga jeta prej pushtetari, ai i ka krijuar vetes një Kosovë paralele ku gjërat s’mund të jenë keq kur ai vet është mirë. Prandaj ai sot nuk njeh rritjen e çmimeve e vështirësitë e familjeve kosovare.

Kosova është në krizë shumë më të thellë se çdo shtet evropian – e ne nuk kemi Qeveri që u del në krah qytetarëve të saj. As atëherë kur inflacioni arrinë frikshëm në 14.1% e as atëherë kur propozimet e zgjidhjet i ka që nga marsi i këtij viti në tavolinë.