Ministri i Punës, Arban Abrashi, ka thënë se të dhënat e fundit të Agjencisë së Statistikave së Kosovës lidhur me shkallën e papunësisë në vend janë inkurajuese.

ASK publikoi të premten rezultatet e Anketës së Fuqisë Punëtorë, sipas së cilës, papunësia në vend është 26 për qind, që është rënie prej 9 për qind.

”Duke filluar prej vitit 2012 e deri me 2015, papunësia në Kosovë asnjëherë nuk kishte pësuar rënie nën 30%. Viti 2016 shënon herën e parë që papunësia bie nën këtë nivel, duke arritur në 26.2%”, ka thënë Abrashi.

Abrashi ka thënë se buxheti i ri i Kosovës, që për herë të parë arrin shifrën e dy miliardëve, do të ndikojë në këtë trend pozitiv.

“Jemi te vetëdijshëm për problemet tona ende të shumta, por me këtë trend të rënies së papunësisë, me buxhetin që për herë të parë e arrin shifrën prej dy miliardë eurosh dhe me rritjen e përgjithshme të zhvillimit ekonomik në rreth 4%, këto trende pozitive vetëm sa do të vazhdojnë të rriten duke rritur kështu zhvillimin ekonomik dhe mirëqenien sociale të qytetarëve tanë”, ka shkruar ai në llogarinë e tij në Facebook./Insajderi.com