Sekretari i të rinjve të Lidhjes Demokratike të Kosovës (LDK), Egzon Pacolli, ka publikuar një video që ngre dyshime serioze për një grant prej 100 mijë eurosh, të cilin e ka përfituar kompania “Galaxy AE l.l.c.”, pronar i së cilës është Enver Bajrami, një figurë e lidhur ngushtë me Lëvizjen Vetëvendosje (VV).

Pacolli ka thënë se ky grant, është miratuar në vitin 2022 nga Ministria e Bujqësisë, e udhëhequr nga Faton Peci.

Ai ka kërkuar transparencë për fondet e grantit dhe ka ngritur dyshime mbi mundësinë që ky grant është keqpërdorur.

“Ju lutem, shikoni pamjet dhe gjykoni vetë: A është punuar ndonjë gjë tash e dy vite? Ku kanë përfunduar fondet e grantit?” ka thënë ai në postimin e tij, duke kërkuar që Ministria e Bujqësisë të japë sqarime.

Sipas Pacollit, ky rast është pjesë e një trendi më të gjerë, duke shtuar se kjo kompani ka përfituar fonde publike pa arritur të justifikojë përdorimin e tyre.

Ai gjithashtu i ka drejtuar një thirrje ministrit Faton Peci, duke i kërkuar atij që të publikojë listën e përfituesve të granteve për vitin 2024, për Masën 1, Nënmasën 1.1a – për mbështetje në kultivimin e arrave dhe lajthive.

“Po ashtu, i bëj thirrje Faton Pecit që të publikojë listën e përfituesve për vitin 2024, për Masën 1, Nënmasën 1.1a – Arra dhe lajthia. Pse nuk po e publikon? Çfarë po fsheh? 7 raste 700 mijë euro,” ka shkruar Pacolli.