Ish-kryeministri i Kosovës dhe deputeti i LDK’së Avdullah Hoti ka reaguar ndaj deklaratave të ministrit të Financave dhe Transfereve, Hekuran Murati i cili fajësoi LDK-në që rënia e inflacionit nuk po reflekton në uljen e çmimeve të produkteve.
Arsyeja pse qytetarët vazhdojnë të paguajnë më shtrenjtë për vaj, miell e bukë, sipas Muratit, është sepse ligjin për çmimet tavan, LDK e dërgoi në Gjykatë Kushtetuese.
Por Hoti nuk është pajtuar me kufizimin e çmimeve.
Ai ka thënë se inflacioni mund të kufizohet me ligj vetëm në sistemet komuniste.
“Po të mund të kufizohej me ligj rritja e çmimeve në ekonominë e tregut, sigurisht se gjermanëve, amerikanëve, britanezëve, e shumë të tjerëve që kanë ekonomi tregu, do u kishte ra ndërmend deri më tani. Në fakt, po, inflacioni mund të kufizohet me ligj, por vetëm në sistemet komuniste”, ka shkruar Hoti.
“Kosova është vend i lirë, me demokraci dhe ekonomi të tregut, e shpallur më 2008, e kundërshtuar nga disa, por tani është realitet që detyrimisht duhet respektuar, përfshirë disa që kanë bindje tjera dhe që stuhia i solli në qeveri”, ka shkruar në fund ai.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
