Deputeti i Partisë Demokratike të Kosovës, Ferat Shala ka akuzuar kryeministrin, Albin Kurti për ndërhyrje në procesin për përzgjedhjen e anëtarëve të Bordit të Komisioni i Pavarur për Miniera dhe Minerale (KPMM).
Shala sot në seancën e Kuvendit, ka deklaruar se kryeministri i ka ftuar kandidatët për anëtarë të Bordit të KPMM-s në zyrën e tij ende pa u votuar të njëjtit në Kuvendin e Kosovës.
“Nëse dështon procesi, e kemi të qartë se kryeministrit s’ia kanë plotësuar kërkesat”, ka thënë Shala.
“Komisioni i Pavarur për Miniera dhe Minerale është institucion i pavarur, i rregulluar me ligj i dalë nga Kushtetuta e Kosovës dhe i përgjigjet Kuvendit. Në këtë proces kaq të gjatë, me shumë shkelje kemi ndërhyrje direkte të kryeministrit në këtë proces, vetëm sa për informacion, kryeministri pa asnjë bazë ligjore fillon dhe i fton para se ne t’i votojmë anëtarët e propozuar nga ministria në bisedë të caktuar në zyrën e tij, e nganjëherë edhe në zyrën e zëvendësministrit të Financave”. tha deputeti i PDK-së.
“Pra, një ndërhyrje dhe një shkelje ligjore, sepse ekzekutivi dhe legjislativi në këtë rast jemi të ndarë dhe ky komision i përgjigjet Kuvendit”, u shpreh ai.
“Çka kërkon kryeministri të ndërhyjë në këtë proces të hapur dhe të intervistojë kandidatët e propozuar… Nëse dështon procesi atëherë e kemi shumë të qartë që kryeministrit nuk ia kanë plotësuar kërkesat minimale që atij i duhen për këtë proces”, tha Shala.
Deputeti Shala bëri edhe një kërkesë publike për të gjithë kandidatët, që siç tha ai, të mos bien pre e politikës ditore dhe që të zbatojnë ligjin.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
