Kryetari i Lipjanit, Imri Ahmeti ka bërë të ditur se disa fshatra të komunës që udhëheq janë në terr.

Ai përmes një shkrimi në Facebook përgjegjës i ka bërë Qeverinë, pasi, sipas tij, kanë dështuar të menaxhojnë si duhet këtë çështje.

“Kjo është një pasqyrë e qartë e mungesës së planifikimit, përkushtimit dhe përgjegjshmërisë ndaj nevojave bazë të qytetarëve. Kjo situatë nuk është thjesht një sfidë – është një dështim që nuk mund të tolerohet më.

Së bashku, duhet të kërkojmë llogaridhënie dhe veprime konkrete për të mos lejuar përsëritjen e kësaj papërgjegjshmërie. Tmerr!”, shkroi Ahmeti ndër të tjera.

Njoftimi i plotë:

Në natën e ndërrimit të moteve, kur familjet mblidhen për të pritur Vitin e Ri, shumë fshatra të komunës sonë u gjetën në terr. Në një moment që duhet të simbolizonte shpresë dhe dritë, na u mohua edhe ajo më elementarja – furnizimi me energji elektrike.

Është e papranueshme që në këtë shekull, të mos jemi në gjendje të planifikojmë dhe të sigurojmë një furnizim të qëndrueshëm për qytetarët tanë. Përgjegjësia për këtë situatë është e qartë: qeveria dhe ministria përkatëse kanë dështuar të menaxhojnë si duhet këtë çështje kaq thelbësore.

Kjo është një pasqyrë e qartë e mungesës së planifikimit, përkushtimit dhe përgjegjshmërisë ndaj nevojave bazë të qytetarëve. Kjo situatë nuk është thjesht një sfidë – është një dështim që nuk mund të tolerohet më.

Së bashku, duhet të kërkojmë llogaridhënie dhe veprime konkrete për të mos lejuar përsëritjen e kësaj papërgjegjshmërie.

Tmerr!