Kandidati i Lëvizjes Vetëvendosje për kryetar të Komunës së Gjilanit, Alban Hyseni, ka vazhduar takimet me qytetarë dhe përfitues të projekteve komunale, duke theksuar angazhimin e tij për zhvillimin ekonomik të komunës përmes përkrahjes së bizneseve lokale dhe sektorit bujqësor.
Në një vizitë të realizuar te sipërmarrësja Blerta Rexhepi, e cila ka përfituar grante komunale në formë pajisjesh për të zhvilluar biznesin e saj, Hyseni vlerësoi lartë kontributin e grave në ekonominë lokale. Ai tha se përkrahja për gratë në biznes nuk do të mungojë as në mandatin e ardhshëm.
“Bisedova sot me zonjën Rexhepi për sfidat dhe planet e saj, dhe u zotova se do të vazhdojmë t’i përkrahim gratë në çdo hap të rrugëtimit të tyre drejt suksesit në biznes”, shkroi Hyseni në rrjetet sociale.
Po ashtu, Hyseni vizitoi fermën e Emrah Adiler në fshatin Doberçan, një nga përfituesit e granteve bujqësore. Ai u prit nga fermeri, i cili e njoftoi me sfidat dhe angazhimet e përditshme në fermë.
“Doberçani njihet për fermerë të ndershëm dhe që jetojnë nga puna e tyre. Puna dhe përkushtimi i Emrahut është frymëzim për të gjithë neve”, tha Hyseni.
Ai ritheksoi se mbështetja për sektorin e bujqësisë do të mbetet prioritet i tij edhe në mandatin e ardhshëm, duke shtuar se investimet në bujqësi janë thelbësore për zhvillimin e qëndrueshëm të Gjilanit rural.
“Angazhimi im mbetet i qartë: mbështetje dhe investim për bujqësinë e Gjilanit. Jemi bashkë!”, përfundoi ai.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
