Ambasada amerikane në Beograd ka kumtuar se drejtësia për vëllezërit Bytyqi dhe për familjen e tyre, si dhe përgjegjësia e atyre të cilët kanë kryer dhe fshehur vrasjen e tyre mbetet një nga prioritetet për marrëdhëniet bilaterale në mes SHBA dhe Serbisë.

Ambasada e tha këtë me rastin e 22 vjetorit të zhdukjes së tre amerikanëve me prejardhje nga Kosova derisa ishin në paraburgim, dhe më vonë trupat e tyre u gjetën në Petrovo Selo afër Beogradit.

“Ne nuk mund – dhe nuk do ta harrojmë këtë krim. Drejtësia për vëllezërit Bytyqi dhe familjet e tyre dhe përgjegjësia e atyre që kryen dhe fshehën vrasjen e tyre, mbetet një nga përparësitë në marrëdhëniet tona dypalëshe me Serbinë”, shkruan Ambasada e SHBA në kumtesën e saj.

Qeveria e SHBA përsëri u bën thirrje autoriteteve serbe, të cilat, kanë premtuar ndihmë në lidhje me këtë çështje për vite, të kryejnë hetimet serioze e të plota.

Ky rast, si shumë të tjerë, tregon nevojën urgjente që Serbia të zgjidhë hetimet e papërfunduara të krimeve të luftës dhe t’i përkushtohet forcimit të shtetit ligjor, përfundon Ambasada në kumtesë.

Ilir, Agron dhe Mehmet Bytyqi janë shtetas amerikanë me prejardhje nga Kosova që u bashkuan me Brigadën Atlantiku të Ushtrisë Çlirimtare të Kosovës gjatë luftës së vitit 1999 në Kosovë.

Askush ende nuk është akuzuar për vrasjen e tyre dhe dy oficerë policie të cilët u gjykuan për heqjen e tyre të paligjshme të lirisë u liruan nga akuzat në vitin 2013./Insajderi.org.