Shtëpia e William Ryerson, Ambasadorit të parë amerikan në Shqipëri, është zbukuruar për 28 Nëntorin me dy flamuj shqiptarë.

Kryeredaktori i një gazete në gjuhën shqipe në SHBA, Ruben Avxhiu, ka publikuar një fotografi të shtëpisë së tij, që ndodhet afër kryeqytetit Washington.

“Shtëpia e Ambasadorit Bill Ryerson, afër Washington-it, e stolisur sot jo me një, por me dy flamuj shqiptarë, me rastin e 28 Nëntorit. William Ryerson ishte Ambasadori i parë i SHBA-së në Shqipëri pas rrëzimit të komunizmit dhe rivendosjes së marrëdhënieve diplomatike mes dy vendeve, pas më shumë se 40 vjet ndërprerje”, ka shkruar Avxhiu krahas fotografisë.

William Ryerson shërbeu si Ambasador i Jashtëzakonshëm dhe Fuqiplotë i SHBA-së në Shqipëri nga viti 1991 deri në vitin 1994, një periudhë e rëndësishme për forcimin e lidhjeve ndërmjet dy shteteve pas rënies së regjimit komunist.