Trajneri i Real Madridit, Carlo Ancelotti është pyetur rreth Kylian Mbappes dhe të ardhmes së tij që lidhet me klubin spanjoll.

Mirëpo, trajneri italian vendosi t’i ik pyetjes për yllin francez, duke thënë se është i fokusuar në futbollistët e tij.

“Do të flas vetëm për futbollistët e mi, pasi ata janë shumë, shumë të mirë”, ka thënë Ancelotti.

Mbappe po lidhet me një transferim në kryeqytetin spanjoll te Real Madridi, pasi para disa ditësh kishte konfirmuar se do të largohet nga PSG si lojtar i lirë.

Derisa, ai i veçoi edhe me emra disa futbollistë, që sipas tij po përmirësohen dita ditës.

“Vinicius JR po përmirësohet çdo ditë e më shumë. E njëjta vlen edhe për Jude Bellinghamin, i cili është përshtatur shumë mirë me klubin tonë”, shtoi trajneri italian.

Carlo Ancelotti në fund të vitit të kaluar kishte nënshkruar kontratën e re, e cila e mban në klub deri në vitin 2026.

Gjatë garave të sivjetme, trajneri italian arriti të fitojë La Ligan me Real Madridin, teksa është edhe në finalen e Ligës së Kampionëve, të cilën do ta luajë më 1 qershor ndaj Dortmundit.

Trajneri 64-vjeçar triumfoi edhe në Superkupën spanjolle në janar, kur mposhti në finale Barcelonën.