Futorja ndaj Rayo Vallecanos e riktheu Real Madridin në krye të La Ligas, edhe pse Barcelona e ka një golaverazh më të mirë dhe një ndeshje më pak të zhvilluar.
Sidoqoftë, triumfi i fundjavës me rezultat 2:1 e ka gëzuar trajnerin Carlo Ancelotti, ndonëse fitorja ishte e mundimshme dhe me jo pak vuajtje.
“Ndjenja është e mirë, objektivi ishte që t’i merrnim tri pikë. Pjesa e parë ishte mjaft e mirë, në vazhdim ishte paksa më e komplikuar”, deklaroi trajneri italian pas lojës.
“I kishim disa raste për të shkuar në 3:1, por kur arrin në minutat 70 apo 75 me rezultat 2:1, duhet të mbrohesh mirë dhe t’i evitosh problemet. I kuptoj tifozët që nuk iu pëlqeu pjesa finale, por skuadrat që luajnë në Ligën e Kampionëve kanë pasur probleme në vikend: Interi, Liverpooli, Bayerni… Dhe, Rayo luan futboll me intensitet mjaft të lartë”, vazhdoi “Don Carlo”.
Ai foli edhe për Kylian Mbappen, i cili po vazhdon me formë të jashtëzakonshme.
“E shënoi një gol spektakolar, kemi luajtur mjaft mirë deri në minutën e 70-të, mund ta shënonim edhe golin e tretë. Kur mendoj se duhet të mbrohemi, i largoj sulmuesit. Nuk e shoh këtë si një problem, do të rikthehet i dobishëm për ndeshjen e së mërkurës. Kylian është mirë, e shënoi një gol spektakolar, luftoi sa mundi. Ai bëri shumë mirë”, përfundoi Ancelotti.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
