Gjykata e Apelit e Kosovës ka aprovuar si të bazuar ankesën e  të pandehurit Enver Hasani kundër aktvendimit të Gjykatës Themelore në Prishtinë të datës 04.11.2016.

Insajderi ka raportuar para tre ditësh lidhur me këtë vendim i cili ende nuk ishte bërë publike, pasi që ende nuk u ishte ndarë palëve në procdurë.

Aktakuza ndaj të pandehurit Hasani, e ngritur me 13 janar 2016, nga ana e Prokurorisë Speciale, për veprat  penale ‘Keqpërdorim i detyrës zyrtare’ dhe ‘Falsifikim i dokumentit zyrtar’, është hedhur dhe ndaj tij është pushuar procedura penale.

Sipas vlerësimit të kësaj gjykate, pretendimet ankimore janë të bazuara, ngase veprimet inkriminuese për të cilat ngarkohet i pandehuri, nuk përbëjnë vepër penale, për faktin se në to nuk përmbushet asnjeri nga elementet të veçantë të veprës penale për të cilat i pandehuri është akuzuar./Insajderi.com