Xhafer Bytyqi, i cili është edhe arsimtar në shkollën ku mëson edhe mbesa 16-vjeçare e tij, ka pranuar se notat e mësimit mbesa e tij, Shkurta, i kishte marrë pa meritë.

Këtë ai e ka bërë të ditur përmes një reagimi publik, në të cilin përveç tjerash sqaron incidentin por edhe tregon haptas se në një mënyrë apo tjetër, ai kishte ndikuar në përmirësimin e notave të 16-vjeçare.

“Klasën e dhjetë e kaloi me nota minimale pozitive, disa prej të cilave jomeritore pasi që disa kolegë të mi e kishin notuar pozitivisht jo për shkak të ndërhyrjes time por për shkak të respektit që kanë ndaj meje”, ka thënë Bytyqi.

E mitura nga fshati Ratkoc i Rahovecit u rrah nga xhaxhai i saj dhe dy djemë të tjerë në afërsi të Shkollës së Mesme “12 Maji” në Rahovec. Asambleisti i PDK-së thotë se ai ushtroi dhunë ndaj mbesës së tij për shkak të devijimit nga shkolla.

“Duke u distancuar nga dhuna, u them miqve të mi, të cilëve u kam borgj këtë publikim se ndaj Shkurtës, përveç rastit të përshkruar më lartë asnjëherë tjetër nuk është ushtruar dhunë. As para as pas rastit. Ajo ende nuk e ka hapur dhuratën që xhaxhai i saj Hidajeti ja ka sjellur nga Gjermania. Familja ime do të jetojë ndershmërisht dhe në paqe ashtu siç ka jetuar deri tani pavarësisht nga situata të cilën po e kalojmë”, ka treguar Xhaferi, në një reagim të gjatë. /Insajderi.com

Xhaxhai rrah brutalisht mbesën 16 vjeçare