Toma Fila, avokati i Ratko Mlladiq, ka thënë se klienti i tij nuk ka asnjë gjasë të shpëtojë, kur nesër t’i shqiptohet vendimi përfundimtar mbi akuzat për vrasjen e më tepër se 8 mijë burrave e djemve myslimanëve të Bosnjës, më 1995.

Sipas tij, të dënuarit të mëhershëm me burgim të përjetshëm nga Tribunali i Hagës për Krime Lufte në Ish-Jugosllavi, për akuzat në lidhje me masakrën e Srebrenicës dhe pastrimin etnik të boshnjakëve dhe myslimanëve, mund t’i ndihmojë vetëm Zoti.

“Do të shkoj në kishë e t’i lutëm Zotit. Kjo është krejt cfarë mund të bëjë. Vetëm Zoti mund t’i ndihmojë, kjo është shpresa ime e vetme”, ka thënë Fila për agjencinë e lajmeve “Srna”.

Ish gjenerali që komandoi forcat serbe gjatë luftës në Bosnjës në vitet 1992-1995, ishte dënuar edhe më herët për këto akuza. Më 22 nëntor 2017 i ishte dhënë burgimi i përjetshëm.

Ai u shpall përgjegjës për mbikëqyrjen dhe monitorimin e vrasjes së më tepër se 8 mijë burrave dhe djemve myslimanë në Srebrenicë, më 1995.

Po ashtu, trupi gjykues gjeti Mlladiqin fajtor edhe për fushatat e spastrimit etnik ndaj boshnjakëve dhe kroatëve, e po ashtu edhe për vrasjen dhe terrorizimin e civilëve në kryeqytetin e Bosnjës, gjatë rrethimit 43 muajsh të Sarajevës. Më tepër se 80 media pritet ta transmetojnë vendimin e paralajmëruar për të martën në orën 15.