Avokati i pilotes ukrainase, Nadia Savchenko, sot e ka filluar paraqitjen e argumenteve përfundimtare në një gjykatë të Rusisë, e cila e akuzon Savchenkon lidhur me vrasjen e dy gazetarëve rusë në pjesën lindore të Ukrainës.

Nadia Savchenko, po ashtu, pritet që më vonë ta paraqes fjalën e saj finale, ndërsa vendimi i gjykatës pritet menjëherë pas fjalës përfundimtare.

Një prokuror rus dje ka kërkuar që Savchenko të dënohet me 25 vjet burg.

Savchenko ishte duke luftuar në kuadër të një batalioni vullnetar kundër sepatratistëve të mbështetur nga Rusia në pjesën lindore të Ukrainës, kur ishte zënë në qershor të vitit 2014.

Ajo thotë se separatistët e kanë rrëmbyer atë dhe e kanë dërguar në Rusi, ku ajo është burgosur dhe akuzuar. Savchenko i ka hedhur poshtë akuzat.

Kievi thotë se akuzat kundër saj janë të fryera dhe se ajo duhet të trajtohet si e burgosur e luftës.

Nadia Savchenko është kërcënuar se nuk do të merr ushqim dhe ujë nëse nuk lejohet të kthehet në Ukrainë, brenda 10 ditësh pas vendimit të gjykatës.