Sot, zyrtarët e degës së LDK-së në Ferizaj, bënë homazhe tek varrezat e dëshmorëve.

Në këtë rast, Kryetari i degës së LDK-së në Ferizaj Visar Azemi, bashkërisht me Kryetaren e Forumit të Gruas, dega Ferizaj, Bahrije Hyseni dhe zyrtarë të tjerë të LDK-së, vendosën buqeta tek varrezat e Dëshmorëve duke simbolizuar se vetëm të bashkuar,të pamundurën e bëjmë të mundur.

Kryetari i degës së LDK-së në Ferizaj, Visar Azemi, ka shprehur krenarinë dhe respektin e tij për sakrificat e dëshmorëve në Ditën e Flamurit.

“Dita e Flamurit është një moment i veçantë për të nderuar ata që sakrifikuan jetën për lirinë dhe pavarësinë e kombit tonë. Sakrificat e tyre na kujtojnë përgjegjësinë që kemi për të ruajtur këto vlera të shenjta dhe për të ndërtuar një të ardhme më të mirë për të gjithë,” shkroi Azemi.

Ai përmendi rëndësinë e ruajtjes së traditës dhe historisë kombëtare si burim frymëzimi për brezat e sotëm dhe ata të ardhshëm, duke shprehur krenarinë për trashëgiminë e përbashkët kombëtare.

Theksojmë se Bahrije Hyseni është kandidate për deputete dhe njëra prej grave më të votuara për asambliste në Kosovë.