Sekretari i përgjithshëm i Kombeve të Bashkuara, Ban Ki-moon, ka kritikuar, siç ka thënë ai, politikat gjithnjë e më kufizuese ndaj migrantëve në Evropë.

Në një fjalim në Parlamentin e Austrisë, ai ka thënë se kufizimet bien ndesh me obligimet ndërkombëtare të secilit shtet.

Ban i ka bërë këto komente një ditë pasi ligjvënësit austriakë kanë miratuar një ligj, i cili kufizon të drejtat e azilit dhe lejon që shumica e kërkesave të refuzohen në kufi.

Bashkimi Evropian, përfshirë Austrinë, është duke luftuar për të përballuar fluksin e madh të migrantëve, shumica prej tyre sirianë.

Mbi një milion njerëz kanë arritur në Evropë vitin e kaluar, duke shkaktuar krizën më të keqe me refugjatë qysh nga Lufta e Dytë Botërore.

“Jam i shqetësuar se vendet evropiane janë duke miratuar politika gjithnjë e më kufizuese kundër migrimit dhe refugjatëve”, ka thënë Ban.

Ai nuk ka përmendur ndonjë vend në mënyrë specifike.