Barcelona ka fituar 3-1 ndaj Vissel Kobe në miqësoren e parë të verës, por lajmi më i madh vjen nga një emër i ri: Dro.
I njohur me emrin e tij të plotë Pedro Fernández Sarmiento, 17-vjeçari nga La Masia debutoi për ekipin e parë dhe shënoi golin e tij të parë vetëm tetë minuta pasi hyri në lojë, duke lënë pas emocione dhe duke fituar menjëherë vëmendjen e tifozëve dhe të trajnerit Hansi Flick.
Hansi Flick, pa kompromis me talentin
Trajneri gjerman, i njohur për besimin që i jep të rinjve, vazhdon të ndjekë filozofinë e meritokracisë. Ashtu siç e ka bërë në të kaluarën, ai nuk nguron të promovojë lojtarë nga akademia kur ata e meritojnë.
“Më pëlqyen shumë debutimet e Jofre Torrents dhe Dro. Dro shënoi një gol… Jam i lumtur që i kam. Duhet të kujdesemi për ta, t’i ndihmojmë të përmirësohen”, deklaroi Flick pas ndeshjes në Japoni.
Debutim me emocione për Dron
I lindur në Vigo, me nënë filipinase dhe baba galician, Dro iu bashkua Barcelonës në vitin 2022 dhe ka kontratë deri në vitin 2027. Ai u aktivizua në minutën e 79-të të ndeshjes, duke zëvendësuar Rashfordin, dhe shënoi tetë minuta më vonë.
“Hyrja ime ishte me pak nervozizëm, por në rastin e parë që mu dha, shënova. Të luash për klubin më të madh në botë është ëndërr. Dua të falënderoj trajnerin dhe shokët për besimin”, deklaroi ai pas ndeshjes.
A goal #MadeInLaMasia
— FC Barcelona (@FCBarcelona) July 27, 2025
✍ Dro pic.twitter.com/yZ0htwNQ7n
Një talent që po rritet
Teknika, vizioni, kontrolli i topit dhe kreativiteti i Dros kanë bërë që jo vetëm Flick, por edhe drejtuesit e klubit, të jenë të entuziazmuar për të ardhmen e tij.
Barcelona tashmë ka nisur bisedimet për rinovimin e kontratës së tij, duke mos dashur të rrezikojë humbjen e një talenti të tillë.
La Masia vazhdon të prodhojë yje, dhe me Dro, duket se Barcelona ka gjetur një tjetër futbollist që premton shumë për të ardhmen.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
