Zyra e Bashkimit Evropian në Kosovë ka shprehur shqetësim lidhur me deklaratat e kryeministrit Albin Kurti në lidhje me Gjykatën Kushtetuese.

Javën e kaluar, Kurti kritikoi vonesat në trajtimin e ligjeve nga ky institucion, duke theksuar se këto vonesa po pengonin reformat dhe progresin pozitiv.

Në përgjigje të këtyre deklaratave, Zyra e BE-së në Kosovë theksoi se Gjykata Kushtetuese duhet të mbetet e pavarur dhe e lirë nga presioni politik.

Sipas zyrës, megjithëse gjyqësori nuk është imun ndaj shqyrtimit dhe diskutimit të hapur, ky shqyrtim duhet të jetë gjithmonë konstruktiv, i balancuar dhe i bazuar në argumente të forta.

Zyra e BE-së theksoi rëndësinë e pavarësisë së Gjykatës Kushtetuese për të ruajtur sundimin e ligjit dhe për të mbrojtur të drejtat dhe parimet themelore të Kushtetutës. Po ashtu, u tha se vendimet e Gjykatës duhet të respektohen nga të gjitha institucionet për të siguruar funksionimin e duhur të ndarjes së pushteteve dhe forcimin e kontrollit dhe ekuilibrit në sistemin juridik të vendit.