Doktori i njohur nga Mitrovica, Adem Nura, ishte mik shumë i afërt i Bedri Hamzës, kandidatit të PDK-së për kryeministër.

Hamza ka qenë sot për ngushëllime në familjen e tij.

Në një deklaratë për media, Hamza ka thënë se Mitrovica e ka humbur një mjek të respektuar, ndërsa ai një shok të jetës.

“Vdekja e mikut tim, doktorit dhe profesorit të njohur nga Mitrovica, Adem Nura, më ka pikëlluar jashtëzakonisht shumë. Çdo vdekje është e rëndë, por kjo humbje më ka tronditur thellësisht. Mitrovica e ka humbur një mjek të respektuar, ndërsa unë humba një shok të jetës. Ngushëllime familjarëve, miqve dhe gjithë qytetarëve të Mitrovicës”, ka thënë Hamza.

Doktori Adem Nura është varrosur dje në fshatin Dashec të Komunës së Skenderajt. Gjatë karrierës së tij, Nura ka mbajtur shumë pozita të larta drejtuese në institucione të ndryshme. Adem Nura gjatë luftës së fundit në Kosovë kishte qenë edhe mjek i Ushtrisë Çlirimtare të Kosovës.