I vënë në qendër të akuzave, për faktin se nuk këndon himnin e Zvicrës, mesfushori dhe zëvendëskapiteni i përfaqësueses helvete, Valon Behrami, në një intervistë shumë të gjatë për “Tribune de Geneve” ka preferuar tu përgjigjet skeptikëve.

Në fjalën e tij, futbollisti me kombësi shqiptare, ka vlerësuar dhe ka shprehur mirënjohjen ndaj Zvicrës, por njëkohësisht duke theksuar edhe faktin që askush nuk mund t’i imponojë që të harrojë prejardhjen.

Behrami ka folur gjithashtu edhe në lidhje me ndeshjen ndaj Shqipërisë, me të cilën do të përballet në takimin e parë të vlefshëm për Grupin A në Kampionatin Europian “Francë 2016”, sikurse dhe për të ardhmen e tij te Kosova.

“Po, familja ime është dashur të pres katër vjetër për të marrë azil. Kisha presion dhe frikë për prindërit e mi. Ishim të frikësuar nga ajo që po ndodhte në Kosovë. Unë gjithmonë do t’i jem mirënjohës Zvicrës. Unë gjithmonë do të respektoj këtë vend”.

“Sot unë jam një futbollist profesionist, kam të para dhe gjithçka çfarë dua. Kam punuar shumë dhe kam sakrifikuar për ta arritur, megjithatë, Zvicra ishte pikënisja e çdo gjëje dhe këtë e kam thënë gjithmonë”, deklaroi Behrami.

Ai la të hapur mundësinë që në të ardhmën të marrë një rol të rëndësishëm në futbollin kosovar, por jo në kombëtaren A.

“Është një ndeshje speciale, si dy herë më parë. Atmosfera do të jetë e nxehtë dhe nëse emocionet fitojnë, atëherë kemi bërë gabim të madh. Duhet të kontrollojmë lojën tonë, t’i kontrollojmë nervat tona. Unë jam 31 vjeç dhe nuk do të luaj për Kosovën. Ndoshta do të kem ndonjë rol tjetër në Federatën Kosovare ose për të rinjtë, por në ekipin e parë jo”, përfundoi Valon Behrami. /Insajderi.com