Shefi i Grupit Parlamentar të Lidhjes Demokratike të Kosovës, Ismet Beqiri, është deklaruar për media, pas takimit me ambasadorin amerikan Greg Delawie dhe shefen e Zyrës së BE-së në Kosovë, Natalia Apostolova.

Beqiri e cilësoi takimi si të mirë, përmbajtjesor, tolerant dhe të qetë, duke mos dhënë detaje të tjera për këtë takimin.

Beqiri tha se LDK-ja nuk do të ketë vota kundër Qeverisë së Kosovës dhe kryeministrit Mustafa përderisa  shtoi se LDK-ja është unike ndaj demarkacionit.

“Po ua konfirmoj se LDK kur t’i vjen radha demarkacionit, do të jetë unike. Më unike se të tjerët që po thonë se i kanë votat. Së pari seanca e mocionit, pastaj të tjerat”, tha Beqiri.

Beqiri për mocionin kundër Qeverisë Mustafa e quajti si e drejtë e deputetëve, përderisa tha se është i bazuar në pika të paqëndrueshme dhe dëshira për ta atakuar Mustafën.

Lidhur me raportet mes koalicionit, Beqiri tha se nuk do të ketë vendimmarrje të njëanshme, pasi janë në koalicion.

Ai kërkoi nga partneri i koalicionit, PDK që të respektojë marrëveshjen e koalicionit dhe të mos përkrahen mocionet e opozitës.

Lidhur me mbajtjen e zgjedhjeve të parakohshme, tha se LDK nuk u frikësohet, por se do të donte që të përfundonin punët që janë nisur, e që dikujt po i pengojnë, sipas Beqirit./Insajderi.com