Kandidati për deputet nga Aleanca për Ardhmërinë e Kosovës, Besnik Tahiri, i cili në listën zgjedhore mban numrin 10, ka theksuar se më 9 shkurt do të përcaktohet fati i Kosovës.

Ai ka deklaruar se përmes kësaj dite mund të përcaktohet fati i Kosovës për 100 vitet e ardhshme.

“9 shkurti nuk është një ditë e zakonshme, as zgjedhje e zakonshme. Më 9 shkurt përcaktohet fati i këtij vendi, jo për katër vitet që vijnë, por ndoshta edhe për 100 vitet e ardhshme.”

Tahiri theksoi se është koha që Kosova të ndahet njëherë e përgjithmonë nga udhëheqja e politikës aktuale, e cila, sipas tij, ka shkelur interesat e shtetit.

“Nuk ka ditë e moment më të mirë që Kosova më 9 shkurt të ndahet njëherë e përgjithmonë nga udhëheqja dhe politika e kësaj Qeverie anti-shtetërore.”

Ai shtoi se vendi ka nevojë për udhëheqës që respektojnë vlerat e kombit, trashëgiminë, rezistencën dhe kontributin për liri, duke e vlerësuar UÇK-në si një simbol të pashlyeshëm të lirisë.

“Vendi ynë ka nevojë për njerëz që i njohin dhe i respektojnë vlerat, trashëgiminë, rezistencën dhe kontributin për liri, vlerën më të shenjtë të historisë sonë më të re, që është UÇK-ja. Me numrin 137, Kosova fiton, me ne qytetarët janë në qendër, me ne Kosova do të jetë në NATO,” u shpreh Tahiri.