Presidenti i SHBA-së Joe Biden ka thënë se ishte gabim për të që tha se “koha për ta vënë Trumpin në shënjestër”, disa ditë përpara atentatit të së shtunës ndaj rivalit të tij në zgjedhje.

Komentet e Biden erdhën në intervistën e tij të parë që nga incidenti, në të cilën ai mbrojti retorikën e tij kundër Donald Trump dhe përmendi pse ishte e rëndësishme.

Presidenti i tha Lester Holt të NBC-së, fushata e tij kishte për detyrë të komunikonte qartë kërcënimin e një mandati të dytë të Trump, duke shtuar se fjalët e tij nuk ishin ato që duheshin zbutur, shkruan BBC.

Biden tha se ai do të thoshte që demokratët duhet të përqendroheshin më shumë te Trump, politikat e tij dhe deklaratat e rreme që ai bëri gjatë debatit presidencial në fund të muajit të kaluar.

Gjatë gjithë intervistës, Biden e bëri të qartë se nuk do të tërhiqej në garën presidenciale – pavarësisht thirrjeve nga anëtarët e partisë së tij pas performancës së tij të dobët në debat.

“Unë jam i vjetër”, u ankua ai, ndërsa theksoi gjithashtu se është vetëm tre vjet më i madh se Trump. Ai tha se mprehtësia e tij mendore ishte e mirë dhe renditi arritjet e tij si president – por pranoi se po punonte për të riafirmuar para amerikanëve se ai ishte në detyrë.

“Unë e kuptoj pse njerëzit thonë, “Zot, ai është 81 vjeç. Ua. Çfarë do të bëhet kur të jetë 83 vjeç, 84 vjeç?” Është një pyetje legjitime për t’u bërë”, tha ai.

Ai tha se besonte te votuesit që e mbështetën në masë dërrmuese në zgjedhjet paraprake demokrate. “Unë i dëgjoj ata”.

Presidenti ka bërë thirrje në mënyrë të përsëritur që amerikanët të “ulin tensionin” që nga të shtënat të shtunën, kur Trump u plagos në vesh.

Një pjesëtar i turmës u vra dhe dy të tjerë u plagosën rëndë në sulm.

Rreth një duzinë republikanë kanë fajësuar Bidenin dhe demokratë të tjerë për nxitjen e vrasjes në tentativë të Trump. Shumë prej tyre kanë përmendur në mënyrë specifike komentin “bullseye” të Biden.

Republikani JD Vance tha se në vazhdën e të shtënave se retorika demokrate për kandidatin republikan “çoi drejtpërdrejt në tentativën për vrasjen e Presidentit Trump”.

Sipas Politico, Biden kishte thënë në një telefonatë donatorësh privat: “Unë kam një detyrë dhe ajo është të mposht Donald Trump. Jam absolutisht i sigurt se jam personi më i mirë që mund ta bëj këtë. Pra, ne kemi mbaruar së foluri për debatin, është koha për ta vënë Trumpin në një target”.

Presidenti Biden, në një fjalim në Zyrën Ovale të dielën, denoncoi sulmin dhe u bëri thirrje amerikanëve të “bëjnë një hap prapa”, duke paralajmëruar se “retorika politike në këtë vend është ndezur shumë”.

I pyetur në intervistën e NBC nëse ai kishte bërë gjithashtu një hap prapa për të shqyrtuar deklaratat e tij të kaluara për ndonjë gjë “që mund të nxiste njerëz që nuk janë të ekuilibruar”, Biden tha se retorika nxitëse nuk kishte ardhur nga ai.

“Unë nuk jam përfshirë në atë retorikë”, tha Biden. “Tani kundërshtari im është i përfshirë në atë retorikë”.

“Si flisni për kërcënimin ndaj demokracisë, i cili është real, kur një president thotë gjëra siç thotë ai? A nuk thoni asgjë, sepse mund të nxisë dikë?”.

“Unë nuk jam ai që tha se dua të bëhem diktator ditën e parë, nuk jam ai që refuzoi të pranojë rezultatin e zgjedhjeve.”

FBI e ka identifikuar personin e armatosur që shënjestroi Trumpin si Thomas Mattheë Crooks, 20 vjeç, një punëtor kuzhine nga Bethel Park, Pensilvani, i cili është një republikan i regjistruar.

Një snajper i Shërbimit Sekret qëlloi për vdekje Crooks pasi qëlloi në drejtim të ish-presidentit.