Kreu i diplomacisë së BE-së, Josep Borrell, e përshkroi si “shumë shqetësues” dhe “lajm të keq” vendimin e qeverisë gjermane për të përgjysmuar afërsisht ndihmën e saj ushtarake për Ukrainën vitin e ardhshëm.

Borrell, i cili mori pjesë në një ngjarje në Santander (Spanjën veriore), theksoi se Gjermania, “në terma absolut”, bëri një përpjekje të madhe për të ndihmuar Ukrainën t’i rezistojë pushtimit ushtarak të Rusisë nga viti 2022 dhe deri tani. Ai tha se kontributi i BE-së në këtë fushë është kryesisht nga Gjermania.

“Rrjedhimisht, ulja e ardhshme e ndihmës gjermane për Kievin është shumë shqetësues. Është një lajm i keq”, tha ai.

Qeveria e kancelarit gjerman Olaf Scholz, e cila është ofruesi i dytë më i madh i ndihmës ushtarake për Ukrainën pas SHBA-së dhe më i madhi në Evropë, po kërkon mënyra për të ulur shpenzimet buxhetore dhe vendosi javën e kaluar të përgjysmojë shumën që do t’i ndajë në mënyrë dypalëshe Kievit.