Ministrja për Dialog, Edita Tahiri ka pritur në takim një delegacion nga komuniteti boshnjak të udhëhequr nga deputeti i Kuvendit të Kosovës, Çerim Bajrami.

Në takim ishte e pranishme edhe Adriana Hoxhiq, drejtore e administratës në komunën e Mitrovicës veriore, e ftuar në takim nga ministrja Tahiri.

Tahiri theksoi se pavarësisht që dialogu i Brukselit ka trajtuar vetëm çështjen e integrimit të komunitetit serb në institucionet e Kosovës përmes shuarjes së strukturave paralele serbe në shumë fusha, Qeveria e Kosovës mbetet e përkushtuar për një kujdes të shtuar institucional ndaj komunitetit boshnjak, por edhe gjithë komuniteteve tjera që jetojnë në atë pjesë të vendit.

Në fjalën e tij, deputeti nga komuniteti boshnjak Çerim Bajrami, prezantoi situatën e komunitetit boshnjak që jeton në komunat veriore, duke theksuar se problemet kryesore lidhen me papunësinë, por edhe me një ndjenjë të anashkalimit, duke thënë se përqendrimi vetëm te integrimi i komunitetit serb është një qasje diskriminuese ndaj komuniteteve tjera nga ana e marrëveshjeve të dialogut të Brukselit.

Ai kërkoi që Qeveria e Kosovës t’i kushtoj kujdes komunitetit boshnjak dhe komuniteteve tjera në funksion të një shoqërie demokratike dhe shumetnike./Insajderi.com