Drejtori i Gazetës Express, Berat Buzhala, ka thënë se një hulumtim i publikuar në gazetën online Insajderi, që zbuloi se vëllai i kryeministrit Mustafa ka kërkuar azil në Gjermani e Francë për shkaqe shëndetësore “nuk kishte kurrfarë qëllimi që ta përqeshte, tallte, ose çfarëdo qoftë, vëllain e Kryeministrit Mustafa”.
“Madje, aty në mënyrë korrekte tregohet që ai kishte qenë sëmurë, prandaj kishte kërkuar azil. Tema, ose mesazhi, që përcillet nga shkrimi është ikja e qytetareve nga vendi”, ka thënë Buzhala.
Këto komente Buzhala i ka bërë pas reagimit të kryeministrit Isa Mustafa i cili e ka cilësuar artikullin si shkelje të privatësisë.
Të dielën, Insajderi ka publikuar një artikull ku zbuloi se vëllai i kryeministrit Mustafa ka migruar ilegalisht dhe ka kërkuar azil në Gjermani e Francë për të kërkuar shërbim për një sëmundje.
Pas publikimit të lajmin, kryeministri Mustafa ka telefonuar autorin e shkrimit, kryeredaktorin e Insajderit Vehbi Kajtazi, të cilin e ka kërcënuar dhe ofenduar. Ai pretendon se në këtë rast i është shkelur e drejta e privatësisë vëllait të tij.
Buzhala e cilëson si të papranueshme thirrjen që kryeministri Mustafa ka bërë ndaj gazetarit.
“Të gjithë ne duhet me ia bë me dije Kryeministrit Mustafa që sjellja e tij, thirrja në telefon direkt gazetarin, edhe nëse nuk e ka share fare, është e papranueshme”, ka thënë Buzhala.
“Tutje, në shkrim thuhet se e kanë pritur tre javë Kryeministrin Mustafa që të përgjigjet lidhur me temën. Nuk e ka bere këtë. Kanë kërkuar edhe nga vëllai i tij. As ai nuk e ka bërë këtë. Nëse nuk është përgjigjur para shkrimet, pse e bënte këtë pas shkrimit, ne një forme shumë më të keqe?” ka thënë ai./Insajderi.com
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
