I shumëkërkuari për vrasje me pagesë, Arben Lamçja është arrestuar të dielën në lagjen “Emshir” të Prishtinës.

Gazeta Insajderi raportoi se i arrestuari nënshtetas i Shqipërisë është i kërkuar për vrasje me pagesë, duke zbuluar edhe identitetin e tij.

Lamçja ishte strehuar në Kosovë pasi ishte në kërkim nga autoritetet shqiptare.

Si u bë Kosova strehë e kriminelëve të arratisur nga Shqipëria?

Në Kosovë ishte strehuar edhe narkodilleri, Gëzim Çela. Ai ishte kapur nga Policia e Kosovës në vitin 2023 në qytetin e Vitisë.

Ai ishte në kërkim nga policia e shtetit për veprat penale “Trafikimi i narkotikëve”, kryer në bashkëpunim, në kuadër të grupit të strukturuar kriminal dhe “Kryerja e veprave penale nga organizata kriminale dhe grupi i strukturuar kriminal”.

Policia atje kishte raportuar se 56-vjeçari Çela (Çelaj) fshihej në një banesë në Viti të Kosovës, në pronësi të shtetasit A.I.

Arrestohet në Prishtinë Arben Lamçja

Personi i arrestuar këtë të diel në Prishtinë, ishte cak i operacionit “Plumbi i artë”. Me të është arrestuar edhe një person tjetër, thanë burimet e Insajderit.

Arrestimi i tij u bë i mundur nga njësiti FAST Kosova në bashkëpunimin me Agjencinë Kosovare për Inteligjencë (AKI).

Për Arben Lamçen u lëshuar një urdhër arresti nga SPAK në kuadër të vijimit të megaoperacionit Plumbi i Artë 2, që u krye prej SPAK, BKH, policisë së shtetit dhe strukturave policore në Belgjikë, Holandë dhe Francë.

Mes emrave të 36 urdhërarresteve ishte dhe ai i Arben Lamçes, i cili ndodhej në Prishtinë. Tashmë pritet që Lamçja dërgohet në Shqipëri dhe të njihet me masën e sigurisë.

Operacioni Plumbi i Artë zbardhi 3 vrasje me 6 viktima, të ndodhura në Shqipëri në vitet 2021.

Në krye të grupit kriminal të demontuar ishin vëllezërit Franc dhe Hajdar Çopja që ndodhen jashtë dhe janë në kërkim. /Insajderi.org/