Mbrojtja e Hashim Thaçit, përmes avokates Sophie Menegon ka kërkuar nga Gjykata e Apelit të Speciales që të vendosë se gjyqtarja e procedurës paraprake, Marjorie Masselot nuk ishte kompetente për të konfirmuar aktakuzën ndaj tij dhe rrjedhimisht kërkoi që të hudhet poshtë akti akuzues.
Më 8 maj 2025, mbrojtja kishte parashtruar se gjyqtarja Masselot s’kishte juridiksion mbi çështjen e Thaçit në të cilën akuzohet për vepra penale kundër administrimit të drejtësisë, raporton “Betimi për Drejtësi“.
Ndërsa, më 19 qershor 2025, gjyqtarja Masselot kishte refuzuar ankesën e mbrojtjes. Por, më 30 qershor 2025, mbrojtja kërkoi leje për apelim dhe më 23 korrik 2025 u vendos që të lejohet apelimi.
Mbrojtja argumentoi se trupi gjykues në rastin për krime lufte ishte privuar nga mundësia për të menaxhuar aspektet themelore të çështjes së saj sepse Prokuroria krijoi procedura paralele tek gjyqtarë të tjerë për aspekte të çështjes për krime lufte.
Madje, mbrojtja thotë se ndonëse ekziston rasti kundër administrimit të drejtësisë, pyetja nëse Thaçi ndikoi në dëshmitarë mbetet të marrë përgjigje në çështjen për krime lufte.
Në kërkesë, thuhet se trupi gjykues tashmë ka pranuar prova lidhur me këtë aspekt dhe kjo rritë mundësitë reale që gjetjet në këto pyetje faktike të bëhen në aktgjykimin e gjykimit krime lufte.
Menegon pretendon se gjyqtarja e procedurës paraprake aplikoi gabimisht parimin “res judicata”.
Avokatja thotë se arsyetimi i Masselot për parimin në fjalë është interpretuar gabimisht, duke thënë se palët në çështjen për krime lufte dhe atë kundër administrimit të drejtësisë zhvillojnë procedura në mënyrë të pavarur nga njëra-tjetra.
“Në të vërtetë, fakti që dy vendimmarrës gjyqësorë do të bëjnë vlerësime të ndara, dhe mund të jenë ndryshe, është pikërisht arsyeja pse parimi është i nevojshëm për të parandaluar gjetje të pasakta ndërmjet palëve të përbashkëta në proces”, thuhet në parashtrim.
Mbrojtja kishte parashtruar se caktimi i Masselot edhe si gjyqtare për udhëheqjen e çështjeve hetimore para aktakuzës si dhe më pas emërimi i saj si gjyqtare e procedurës paraprake, e shkel ligjin e DhSK-së.
Pra, Menegon argumenton që sipas ligjit, një gjyqtar nuk mund të emërohet për të vendosur në dy faza të ndryshme të së njëjtës çështje. Ky rol i dyfishtë, sipas mbrojtjes është luajtur edhe nga gjyqtari Nicolas Guillou e më pas edhe nga Masselot.
“Kjo shkel kuptimin dhe qëllimin e qartë të Nenit 33(4) të Ligjit të DhSK-së, i cili siguron se një gjyqtar nuk mund të vendos kurrë në faza të ndryshme të të njëjtës çështje”, thuhet në parashtrim.
Por, në vendimin e saj ku u refuzua ankesa e mbrojtjes, Masselot kishte thënë se nuk mund të vendoste ajo për ankesën kundër emërimit të saj, pasi emërimi është përgjegjësi e kryetares së gjykatës.
Mbi këtë bazë, avokatja Menegon kishte kërkuar edhe hudhjen e aktakuzës, e që Masselot e kishte refuzuar këtë kërkesë e cila më pas i ishte drejtuar Apelit.
“Parashtresa e mbrojtjes argumentoi se caktimi i Gjyqtares Masselot si Gjyqtare Paraprake ishte i pavlefshëm jo për shkak se ajo ishte e paanshme, por sepse caktimi i saj shkelte Nenin 33 të Ligjit të DhSK-së”, thuhet në parashtrim.
Andaj, për këto arsye, mbrojtja kërkoi nga Paneli i Apelit që të shfuqizojë vendimin e kontestuar dhe të konstatojë se gjyqtarja e procedurës paraprake nuk ishte kompetente për konfirmimin e aktakuzës në çështjen 12, për rrjedhojë të hudhet aktakuza në këtë çështje.
Hashim Thaçi ndodhet në Qendrën e Paraburgimit në Hagë që nga nëntori i vitit 2020. Ai është duke u gjykuar për krime lufte, si dhe vitin e kaluar i është ngritur aktakuza kundër administrimit të drejtësisë.
Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.
Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.
Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.
Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.
Ndërsa, lidhur me rastin kundër administrimit të drejtësisë, Bashkim Smakaj, Fadil Fazliu dhe Isni Kilaj u arrestuan më 5 dhjetor 2024 në Kosovë dhe u transferuan në objektin e paraburgimit në DhSK, më 6 dhjetor 2024 në bazë të aktakuzës së konfirmuar dhe fletarrestimeve të lëshuara nga Haga.
Ndërsa, Thaçit i është dorëzuar fletarrestimi në objektin e paraburgimit në Hagë më 5 dhjetor 2024, gjithnjë sipas njoftimit të DhSK-së.
Kurse, Hajredin Kuçit i është dorëzuar aktakuza e konfirmuar dhe fletëthirrja për t’u paraqitur para gjykatëses së procedurës paraprake për paraqitjen e parë, e cila u mbajt 9 dhjetor.
Sipas aktakuzës, Thaçi individualisht dhe përmes veprimeve të përbashkëta me grupet; Grupi Fazliu (Fadil Fazliu dhe FahriFazliu), Grupin Smakaj (Bashkim Smakaj, Blerim Shala dhe Artan Behrami) si dhe Grupin Kilaj (Isni Kilaj dhe VllaznimKryeziu), kanë ndjekur një model të sjelljes për të penguar personat zyrtarë në kryerjen e detyrave zyrtare.
Në aktakuzë thuhet se Thaçi ka udhëhequr dhe marrë pjesë në këto përpjekje përmes vizitave të tij në objektet e paraburgimit gjatë kohës sa ishte i paraburgosur në kuadër të gjykimit të tij për krime lufte dhe krime kundër njerëzimit.
Aty thuhet se anëtarët e Grupit Fazliu, Grupit Smakaj dhe Grupit Kilaj u koordinuan për të ndikuar në dëshmitarët e ZPS-së gjatë vizitave jo të priveligjuara të datave 2 korrik, 9 shtator dhe 6 tetor 2023.
Si rrjedhojë, ndaj Thaçit rëndojnë tri akuza për pengim të personit zyrtar në kryerjen e detyrave zyrtare, tri për shkelje të fshehtësisë së procedurës dhe katër akuza për mosëndje ndaj gjykatës.
Ndërsa, Kilaj, Smakaj dhe Fazliu akuzohen për tentativë të pengimit të personave zyrtarë në kryerjen e detyrave zyrtare dhe mosëndje ndaj gjykatës. Kurse, Kuçi i ka dy akuza për mosëndje ndaj gjykatës.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
