Kryetari i Kuvendit të Serbisë, Ivica Daçiq, ka deklaruar se parlamenti serb ka formuar grupe parlamentare të miqësisë me të gjitha vendet që nuk e njohën pavarësinë e Kosovës, si dhe me ato vende që tërhoqën njohjen e tyre.

Në Kuvendin e Serbisë, ku janë duke u zhvilluar diskutimet mbi marrëveshjet ndërkombërare, përfshirë edhe atë me Mbretërinë e Lesotos, e cila ka tërhequr njohjen e Kosovës, Daçiq u lavdërua se “si ministër i jashtëm, ai ka punuar në një veprim të përbashkët shtetëror për të tërhequr njohjen e Kosovës”.

“Në gjithë këtë, ne kemi pasur mjetet për të nënshkruar marrëveshje të ndryshme, nga heqja e vizave, deri te bashkëpunimi në fushën e sigurisë dhe mbrojtjes. Lesoto është një nga vendet e para që tërhoqi njohjen e Kosovës”, ka pretenduar Daçiq.

Mirëpo, Daçiq ka paralajmëruar se “qeveria në Mbretërinë e Lesotos është ndërruar dhe se situata duhet të monitorohet në mënyrë që të mos ketë asnjë ndryshim në këtë çështje të rëndësishme për Serbinë”./Insajderi.org.