Princ Leka II dhe Elia Zaharia kanë kurorëzuar sot dashurinë e tyre me martesë.

Ceremonia e martesës është mbajtur në Pallatin e Brigadave, ndërkaq kurorëzimin e çiftit mbretëror e bëri kryebashkiaku i Tiranës Erion Velia.

Më tej krerët e të gjitha komuniteteve fetare, atij mysliman, katolik, ortodoks dhe bektashi kanë bekuar lidhjen mes Princit Leka dhe Elia Zaharia .

Dashuria e cifitit ka filluar në vitin 2008, kurse kurorëzimi u bë sot duke shënuar edhe ditëlindjen e Mbreti Zog, me ç`rast Elia Zaharia merr edhe titullin princesha Elia Zogu.

Elia ka veshur një fustan ngjyrë kremi me krahë tyl, i cili është stiluar nga një stiliste kosovare ndërsa Princ Leka ka veshur një kostum ngjyrë të hirtë.

Pas ceremonisë së kurorëzimit, gjithë të ftuarit janë zhvendosur në mjediset e Rezidencës pranë Galerisë së Arteve ku do të mbahet një koktej që do të zgjasë rreth dy orë.

Në qendër të vëmendjes së organizatorëve të këtij eventi dhe dëshirë parësore e Familjes Mbretërore dhe çiftit, është promovimi i traditës, artit, kulturës, veshjeve, kulinarisë, pijeve, muzikës dhe valleve shqiptare të cilat do të shoqërojnë etapat e kësaj dasme.

Pas një pushimi disaorësh, pas koktejit, dasma do të vazhdojë me darkën që do të mbahet në Pallatin e Brigadave me rreth 300 të ftuar, 150 përfaqësues të familjeve të rëndësishme mbretërore, Lartësitë e tyre, të ftuar të huaj dhe 150 të afërm dhe miq të ngushtë të çiftit.