Presidenti serb, Aleksandar Vuçiq ka reaguar pas deklaratës së kryetarit të Kuvendit, Glauk Konjufcës për Asociacionin.

Deklaratën e Konjufcës se qeveria Kurti nuk e ka në plan të formojë një Asociacion mono-etnik, Vuçiq e ka quajtur të sinqertë, raporton Insajderi.

Para gazetarëve, Vuçiq ka thënë se do presin se si do veprojnë ndërkombëtarët për çështjen në fjalë.

“E përgëzoj për ndershmërinë e tij sepse institucionet në Kosovë më në fund u treguan të sinqertë. Ata nuk planifikojnë të formojnë Asociacionin. Të shohim se çfarë do të bëjnë tani amerikanët dhe të tjerët”, potencoi presidenti serb.

Duke komentuar deklaratën e të dërguarit amerikan për Ballkanin Perëndimor, Gabirel Escobar se Asociacioni i Komunave me Shumicë Serbë do të krijohet me kryeministrin ose pa të, Konjufca tha se një gjë e tillë është e pamundur.

“Nuk e kisha shtru çështjen si z. Escobar. Nuk është çështja me Kurtin a pa Kurtin, por pa kryeministrin e Kosovës Asociacioni nuk bëhet. Mirë pra, vjen një kryeministër tjetër, por pa kryeministrin e Kosovës nuk bëhet”.

“Nëse kryeministri dhe presidenti i Kosovës nuk e pranojnë një asociacion mono-etnik, ai kurrë nuk ka me u bë. Nëse një kryeministër e ndryshon qëndrimin, unë mendoj që prapë është vështirë me u bë, sepse dikush gjithmonë e organizon popullin për me ndalë”, ka shtuar ai.

Tutje, i pari i Kuvendit, shprehu edhe gatishmërinë për të protestuar në mënyrë që të ndalet krijimi i Asociacionit mono-etnik dhe me kompetenca ekzekutive. /Gazeta Insajderi