Kryeministri i sapoemëruar i Francës, Michel Barnier, u zotua të enjten se do të punojë me “të gjithë ata që janë në mirëbesim” për më shumë respekt dhe unitet në një vend të ndarë politikisht pas disa muajsh trazirash politike.

“Francezët… sot kanë nevojë dhe shprehën nevojën e tyre për respekt, unitet dhe qetësim”, tha Barnier në fjalimin e tij të parë në detyrë, duke qëndruar në oborrin e zyrës së kryeministrit Matignon pranë paraardhësit të tij, Gabriel Attal.

Presidenti Emmanuel Macron emëroi më parë Barnier, ish-negociatorin e BE-së për Brexit-in, si kryeministër të tij të ri, duke e ngarkuar atë të bashkonte Francën dhe t’i jepte fund paralizës politike që pasoi një zgjedhje të parakohshme jo përfundimtare, shkruan Reuters.