Deputetët e Kuvendit – nga i pari që sipas renditjes është Abelard Tahiri, dhe tek i fundit që është Zoran Maksimoviq – nuk kanë deklaruar asnjë gram ari në Agjencinë për Parandalimin e Korrupsionit. Ari nuk ka deklaruar as Kryekuvendari Glauk Konjufca dhe as Sekretari Ismet Krasniqi.

Një nga deputët të më vjetër të Parlamentit të Kosovës, Xhavit Haliti, ka treguar për stolitë që zotëron kur e ka deklaruar pasurinë për vitin 2022.

Ai në formularin e pasurisë të publikuar vetëm para pak ditësh ka zbuluar se ka rreth 30 mijë euro stoli ari, shkruan Gazeta Insajderi.

Tek kolona ku deklarohen pasuritë e lujtshme, Haliti, ka shkruar se ka 15 mijë euro stoli që i përkasin atij, të cilat i ka nga viti 1985, dhe i ka blerë nga kursimet familjare.

Në një hapësirë më poshtë, deputeti i Partisë Demokratike të Kosovës, e ka deklaruar edhe arin e bashkëshortes së tij, vlera e të cilit po ashtu shkon në 15 mijë euro. Edhe atë e posedon nga viti 1985, dhe gjithashtu zbulon se e ka blerë nga kursimet familjare, shkruan Gazeta Insajderi.

Pasuria e plotë e Xhavit Halitit:

119 deputetë të tjerë s’e deklarojnë asnjë gram ari

Deputetët tjerë të Kuvendit – nga i pari që sipas renditjes është Abelard Tahiri, dhe tek i fundit që është Zoran Maksimoviq – nuk kanë deklaruar asnjë gram ari. Ari nuk ka deklaruar as Kryekuvendari Glauk Konjufca dhe as Sekretari Ismet Krasniqi.

Gazeta Insajderi i ka shikuar të gjitha deklarimet e tyre, dhe ka dalë se asnjëri nga ta, tek kolona ku parashihet të deklarohet kjo pasuri, s’e kanë bërë atë.

Të gjithë ata kanë deklaruar se kanë banesa, shtëpi, toka, lokale, vetura dhe para të gatshme, por nuk kanë treguar për stolitë që zotërojnë.

Pasi duke parë kapitalin e tyre, duket krejt e pamundshme që shumica nga deputetët e kësaj legjislature të mos kenë ari deri në 3 mijë euro, shumë kjo nga e cila duhet të deklarohen gjërat me vlerë, në formularin e Pasurisë, shkruan Gazeta Insajderi.

“Pasuri e luajtshme – veturat, stolitë, veprat e artit, koleksionet e armëve, kafshët, enterierin, veshmbathje apo mallra shtëpiake, dhe çdo send tjetër i luajtshëm vlera e të cilit kalon shumën prej tre mijë Euro siç dokumentohet nga një kontratë, faturë ose dokument i ngjashëm që i ka në pronësi subjekti deklarues dhe anëtari i familjes së tij, thuhet në pikën 1.9. të Nenit 3, në Ligjin për Deklarimin e Pasurisë.

Përpos stolive që s’i kanë zbuluar, deputetët, por edhe kryetari i Kuvendit, Glauk Konjufca, dhe sekretari i Kuvendit, Ismet Krasniqi, nuk kanë treguar as për gjërat tjera me vlerë si koleksionet e armëve, kafshët, enterierin, veshmbathje apo mallra shtëpiake, ashtu siç e parasheh Ligji, shkruan Gazeta Insajderi.

Për këto çështje është pyetur Agjencia për Parandalimin e Korrupsionit, agjenci kjo e cila çdo vjet e zbardhë deklarimin e pasurisë së zyrtarëve publikë.

Gazeta Insajderi i ka çuar pyetje këtij agjencioni për t’i pyetur nëse do të hetohet pikërisht mosdeklarimi i stolive të arit nga deputetët e Kuvendit të Republikës, por ky institucion deri tash nuk ka kthyer përgjigje.

© Gazeta Insajderi