Geert Wilders, politikani populist i famshëm më së shumit për gjuhën e ashpër anti-Islam, u gjet fajtor nga një gjykatë në Holandë për gjuhë urrejtjeje.

Wilders u gjet fajtor për gjuhën e përdorur kundër emigrantëve marokenë në Holandë. Ai nuk ishte në sallë në momentin e vendimit, por pak më para tij shkroi në Twitter se nuk ka ndërmend të ndalet.

Kjo është hera e dytë që ai përballet me drejtësinë.  Në vitin 2011, ai ishte shpallur i pafajshëm për deklarata të tij në një numër intervistash se feja islame është fashiste.  Atë kohë, ai e kishte cilësuar vendimin si “fitore të fjalës së lirë.”

“Cilido qoftë vendimi, unë nuk do të ndaloj së thëni të vërtetën për problemin e marokenëve dhe asnjë gjykatës, politikan apo terrorist nuk do të më ndalojë për këtë”, deklaroi ai

Gjykata u mjaftua me gjetjen fajtor të tij, pa dhënë asnjë ndëshkim dhe gjyqtari i çështjes tha se përse kishte zgjedhur këtë formë

“Vetë gjetja fajtor e tij është dënimi i mjaftueshëm për një politikan që është zgjedhur nga vota e qytetarëve”, deklaroi gjyqtari Hendrik Steenhuis.

Geert Wilders është kryetar i Partisë së Lirisë, një forcë e ekstremit të djathtë që po rritet me shpejtësi dhe sipas sondazheve në zgjedhjet e muajit mars mund të sigurojë deri në 35 deputetë.