Deputeti i Partisë Demokratike të Kosovës, Shaip Muja, i ka dërguar mesazh lidershipit të Nismës për Kosovën, duke thënë se kjo parti ka humbur thellë në zgjedhjet lokale në Komunën e Drenasit, dhe ka ftuar ata që t’i bashkohen fitores së PDK-së.

Muja në veçanti i është kundërpërgjigjur Kryetarit të Këshillit Kombëtar të NISMA-s, Jakup Krasniqi, i cili përmes reagimi para pak orësh ka deklaruar se “PDK është duke e prishur procesin zgjedhor”.

“Partia Demokratike e Kosovës po e rikonfirmon fuqinë e saj në Drenas. Besimi i palëkundshëm i qytetarëve në PDK është i kuptueshëm që i pengon bacës Jakup, i cili përjetimin e humbjes së thellë e paska filluar para kohe”, ka shkruar Muja, njofton Insajderi.

Muja ka thënë se NISMA e ka të sigurt humbjen në Drenas, derisa i ka bërë thirrje lidershipit të kësaj partie që të mos e përjetojë si humbje këtë garë në Drenas, por “si mësim për vëtëdijësim.”

“Do iu dalë tash punë për ta kuruar zhgënjimin e atyre që i kanë mashtruar, duke ndërtuar alibi të llojllojshme për të justifikuar humbjen e tyre, por do të qetësohen dikur. Ky është vetëm fillimi i humbjeve të tyre, por lidershipi i Nismës nuk do duhej t’i përjetonte si humbje, mirëpo si mësime për vetëdijesim“, ka thënë ai.

Muja ka ftuar Nismën për Kosovën që në të ardhmen t’i bashkohet fitoreve të PDK-së.

“Këto zgjedhje janë një mundësi e mirë për Nismën që të reflektojë për gabimet e tyre dhe të bëhet pjesë e fitoreve të PDK-së në të ardhmen”, është shprehura deputeti i PDK-së. /Insajderi.com