Labinota Demi-Murtezi, deputete e Partisë së Drejtësisë në Kuvendin e Kosovës, ka reaguar pas një shkrimi të akademik Mehmet Krajës, përmes të cilit ka kritikuar “atmosferën e imponuar fetare” në Kosovë dhe tendencën që feja islame të bëhet një “fe ideologjike” dhe fe përfituese me qëllim për t’u faktorizuar politikisht.

Kraja ka kritikuar “brezin e ri” të besimtarëve myslimanë duke thënë se ata e nxorën fenë nga besimi, nga nevoja shpirtërore për të gjetur prehjen e amshuar, nga kërkimi i të lartësuarës dhe e kthyen në ideologji, në një korpus idesh pragmatike. “Feja u bë ideologji dhe ideologjia nuk shërben për qëllime të lartësuara, për asgjë hyjnore, por për përfitime tokësore: në radhë të parë për rekrutim bashkëmendimtarësh për të arritur një qëllim”.

Por, sipas deputetes Demi-Murtezi, akademik Mehmet Kraja ka paragjykime ndaj myslimanëve.

“Ne nuk jemi “shpirtra të bjerrë” të strehuar në fenë tonë, por jemi krenarë për veten tonë, për kontributin që kemi dhënë në shtetformim tonë dhe për kontributin që po japim në shtetndërtimin tonë,” ka shkruar ajo në Facebook.

As edhe një fjalë nuk dua të them më shumë, për shkrimin tuaj te fundosur ne paragjykime”, ka thënë ajo./Insajderi.com