Ministrja e Kosovës për Dialog, Edita Tahiri ka deklaruar se dialogu me Beogradin mund të vazhdojë pasi të lirohet dhe kthehet në Kosovë lideri i Aleancës për Ardhmërinë e Kosovës, Ramush Haradinaj dhe pasi që Kuvendi tha shfuqizojë Rezolutën për pezullimin e bisedimeve.

“Në momentin kur hiqet pezullimi (nga Kuvendi i Kosovës), dhe kjo do të ndodhë në momentin kur do të lirohet lideri i AAK-së Ramush Haradinaj, atëherë Kosova duhet të vazhdojë t’i përmbushë obligimet e Marrëveshjes së Stabilizim – Asociimit dhe në kuadër të saj edhe të dialogut të Brukselit”, ka deklaruar Tahiri pas raportimit në Komisionin për Stabilizim-Asociim.

“Besoj që Haradinaj do të lirohet, sepse ai po mbahet padrejtësisht në Francë dhe pastaj është Kuvendi i Kosovës që duhet të marrë vendimin e ri, për heqjen e pezullimit”, ka theksuar Tahiri.

Ajo ka thënë se do ta respektojë plotësisht Rezolutën e Kuvendit për pezullimin e dialogut me Beogradin, përderisa të mos lirohet Ramush Haradinaj.