Zëdhënësi i Bashkimit Evropian, Peter Stano ka thënë se nesër do të ketë një takim në kuadër të dialogut ndërmjet Beogradit dhe Prishtinës në nivelin e negociatorëve kryesorë.

Gjatë një konference, Stano theksoi se urgjente është fillimi i zbatimit të marrëveshjes për rrugën drejt normalizimit të marrëdhënieve mes Kosovës dhe Serbisë, përcjell Insajderi.

“Detyra është normalizimi i marrëdhënieve”, tha Stano dhe shtoi se në fund, vetë palët do të përcaktojnë se çfarë e konsiderojnë normalizim të marrëdhënieve dhe cilat do të jenë pasojat kur të arrijnë atë, me ndihmën e BE-së.

Raundi i ri i këtij dialogut vjen pasi të mërkurën e kaluar u mbajt dialog i nivelit të lartë ndërmjet Beogradit dhe Prishtinës në të cilin morën pjesë presidenti i Serbisë, Aleksandar Vuçiq dhe kryeministri i Kosovës, Albin Kurti. /Insajderi.org