Ambasadori gjerman në Beograd, Aksel Ditman, ka thënë se Serbia është në rrugën e duhur kur është fjala për procesin e anëtarësimit në Bashkimin Evropian.

Ai ka vënë në dukje se qeveria serbe ka bërë shumë edhe në zbatimin e reformave ekonomike.

Në prezantimin e tij në Samitin Ekonomik të 16-të, ai tha se Gjermania vlerëson angazhimin strategjik shumë të qartë të Qeverisë së Serbisë për t’u bërë anëtare e BE-së.

Ditman shprehu besimin se procesi i zgjerimit nuk ka ndryshuar, por ka sfida të caktuara brenda bllokut me të cilën vetëm BE mund të përballet, përkatësisht referendumin në Mbretërinë e Bashkuar, krizën e emigrantëve, duke shprehur bindjen se me këto çështje do të merret  Brukseli, shkruan Tanjug.

“Ne do të mbetemi të përkushtuar në procesin e zgjerimit absolutisht kur bëhet fjalë për Serbinë”, ka thënë ai, duke shtuar se takimi në Paris, në kuadër të Procesit të Berlinit ishte një provë e kësaj.