Drejtori i Radio Televizionit të Kosovës, Mentor Shala, ka drejtuar sërish akuza ndaj Sekretarit Organizativ të Lëvizjes Vetëvendosje, Dardan Molliqaj, për të cilin beson se ka ndikim edhe tek prokuroria.

Në një postim në llogarinë e tij në Facebook, Shala ka thënë se prokuroria e di se kush e ka sulmuar shtëpinë e tij dhe RTK-në “por ata nuk po guxojnë të ndërmarrin masa.”

“Nuk po mundem me besu që deri ku kanë arrit me fut frikën qiftat e Dardan M”, ka shkruar Shala duke iu referuar Molliqajt.

Në një konferencë për media të enjten, Molliqaj ka thënë se Mentor Shala dhe kryeredaktori i RTK-së, Ridvan Berisha, janë disa prej përgjegjësve për “montimin e rastit” kundër aktivistëve të Lëvizjes Vetëvendosje, lidhur me sulmin ndaj ndërtesës së Kuvendit të Kosovës.

Menjëherë pas kësaj deklarate, kishte reaguar Shala që i kishte kërkuar shpjegime Molliqajt lidhur me një sulm me bombë që ka ndodhur më herët në shtëpinë e drejtorit të RTK-së./Insajderi.com