Dardan Krivaqa, i dyshuari kryesor për vrasjen e 18 vjeçares nga Ferizaj, është person i njohur për policinë e prokurorinë në këtë komunë.

Ai përveç rastit tragjik të së dieles ka qenë i përfshirë edhe në vepra të ndryshme penale.

Gazeta Insajderi, merr vesh se Krivaqa ka vepra të ndryshme penale përfshirë “Vjedhje e rëndë”, “Lëndim i lehtë trupor” “Kanosje”, “Lëndim i rëndë trupor”.

Këtë e ka konfirmuar për Insajderin, Prokuroria Themelore e Ferizajt duke thënë se Dardan Krivaqa është recidivist i veprave të ndryshme penale.

Ndaj Dardan Krivaqës rëndon edhe një akuzë e pakonfirmuar se kishte ushtruar dhunë edhe ndaj një vajze tjetër në Francë.

“Ky (Dardan Krivaqa) edhe njëherë ka provuar të mbysë të dashurën e tij në Francë. E ka dërgu atje, e ka rrahur dhe ka tentuar që ta shtyjë që të punojë në prostitucion” – është shprehur një komentues në profilin e tij.

Ndërkohë, në llogarinë e tij në Twitter, adresa e Dardan Krivaqës është shënuar si Paris, Francë.

Dardan Krivaqa, është shpallur në kërkim nga Policia e Kosovës si i dyshuari kryesor për vdekjen e Marigona Osmani, 18 vjeçare nga komuna e Ferizajt.

Gazeta Insadjeri, mëson se Krivaqa ka qenë djalë problematik në Ferizajt dhe ka pas disa raste kur është përfshirë në rrahje dhe therje me thikë në qytet.

Madje për të kanë shkruar edhe bashkëmoshatar nga shkolla e mesme duke thënë se “ia kanë pas frikën”.

Rasti i rëndë ka ndodhur të dielën rreth orës 15:00, ku dy të dyshuarit Arbër Sejdiu i cili tashmë është arrestuar dhe Dardan Krivaqa që gjendet në arrati kanë dërguar në spitalin e Ferizajt viktimën Marigona Osmani pa shenja jete dhe kanë ikur nga spitali.