Policia e Kosovës ka arrestuar sot edhe një person në rastin e konfliktit të armatosur mes Sekiraqëve dhe Capave në Prishtinë. I njëjti po dyshohet se fshehu armën e Salih Sekiraqës.

Gazeta Insajderi nga burime të saj ka mësuar se bëhet fjalë për 33 vjeçarin Vesel Bunjaku.

Sipas prokurorisë, ekziston dyshimi i arsyeshëm se me datë 01.09.2024, pas përfundimit të gjuajtjeve mes dy grupeve, me qëllim të fshehjes dhe manipulimet me prova, i pandehuri Vesel Bunjaku merr dy armë të cilat dyshohet se njëra është e të pandehurit Salihh Sekiraqës revole me ngjyrë të zezë.

Përveç kësaj ai fsheh edhe një tjetër armë e cila dyshohet të jetë e të pandehurit Fatos Abazi me ngjyrë të bardhë, me ç’rast shkon në terasën e lokalit në drejtim të banakut ku nga kamerat e lokalit vërehet se në dorë mban armë, pastaj del nga pjesa e prapme e lokalit i fsheh armët dhe kthehet në lokal sipas kohës së kamerave 21:42:36 ku në duar nuk ka më asgjë.

Prokuroria e ngarkon Bunjakun në bashkëkryerje ka kryer veprën penale “Manipulim me prova”.

Sot, Prokuroria Themelore ka kërkuar nga gjykata vendosjen e masës së paraburgimit.

Në përplasjen mes dy grupeve në kryeqytet, mbetën të plagosur pesë persona dhe një nga ta mbeti i vrarë. /Insajderi