Një 57-vjeçar në Kukës është arrestuar pasi ka regjistruar 21 vite më parë një të mitur që nuk ekzistonte si vajzën e tij dhe më pas falsifikoi sërish dokumente në vitin 2021 për ta shpallur të vdekur fëmijën.

Nga veprimet hetimore rezulton se 57-vjeçari e ka kryer këtë veprimtari kriminale, për të përfituar pension më të lartë, bazuar në ligjin e kohës.

Një mjek dhe administratori i një agjencie funerale janë nën hetim për shpërdorim të detyrës.

Njoftimi i policisë:

Nga provat e siguruara dyshohet se për të përfituar pension më të lartë bazuar në ligjin e kohës, shtetasi Xh. S. ka falsifikuar dokumente, 21 vjet më parë, dhe ka regjistruar brenda trungut të tij familjar (si të bijën), identitetin e një shtetaseje të mitur e cila nuk ekzistonte. Gjithashtu, në vitin 2021, 57-vjeçari ka falsifikuar skedën për vdekjen e kësaj shtetaseje, me qëllim çregjistrimin nga regjistri i Gjendjes Civile.

Për shtetasit A. E. dhe A. E. vijojnë hetimet, me qëllim provimin nëse këta shtetas kanë qenë apo jo të implikuar në nxjerrjen e dokumenteve false që ka përdorur shtetasi Xh. S.