Komisioni i ekspertëve për matjen e territorit të Republikës së Kosovës, përmes një konference për media përkujtuan se dita e sotme është e fundit për konsultime lidhur me raportin për matjen e territorit.

Zëdhënësi Tomor Qela rikonfirmoi edhe një herë se Kosova nuk humbë territor, ndërkaq shtoi se nuk është çështje e kosmisionit se a do ta votojnë deputetët e Kosovës Demarkacionin me Malin e Zi pas konstatimit të tyre se Kosova nuk humbë tokë.

“Komisioni për matjen e territorit nuk e ka pasur as detyrë dhe as qëllim që të ndihmojë punën e qeverisë për të bindur deputetët për ta votuar Demarkacionin. Ne e kemi pasur për obligim ta dokumentojmë sipërfaqen e Kosovës dhe këtë e kemi bërë, se si do të vendosin politikanët është çështje e tyre dhe ne nuk interferojmë në këtë”, tha ai.

Qela u ka bërë ftesë të gjithë personave që kanë kundërshtuar këtë proces që të shkojnë në objektin e qeverisë, ku janë ekspozuar materialet dhe ta nxjerrin një përfundim. Ai shtoi se Komisioni ka pasur një shkallë absolute të transparencës.